王牌前鋒鬥濕滯
周日凌晨米蘭城硝烟四起，AC米蘭同國際米蘭喺意甲合演同城打吡。AC新帥甘柏路仲未為球隊揾到進攻方程式，踢法惟有以守為主，咁啱國米近期進攻同樣遇上阻滯，兩軍都唔想輸波丟架，戰況隨時陷入膠着，中位數2.5球細盤值得留意。
（MyTV Gold 301、Now 638、有線602、614、654及662台周日凌晨2時45分直播）
國米盧卡古煩惱多多
國米今季鋒線出現大變動，由曼聯重金引入比利時前鋒盧卡古，頂替效力多年嘅阿根廷射手莫路伊卡迪，前者自然成為「藍黑軍團」季初嘅焦點人物。不過盧卡古加盟後場外風波一浪接一浪，早前對卡利亞里嘅賽事當中就遭對方球迷以種族歧視言行招呼，事後比利時人喺社交媒體上為自己抱不平，仲畀部分國米極端Fans狂串，鬧佢唔尊重意大利球迷文化。上仗歐聯1比1爆冷畀布拉格斯拉維亞逼和之後，仲爆出佢賽後檢討期間喺更衣室同隊友波索域發生口角，呢位比利時前鋒加盟冇耐就周圍辣火頭，難免會影響到自己場上表現。加上曼聯舊隊友阿歷斯山齊士步盧卡古後塵轉投加盟後仲未操弗，國米進攻效率都幾牙煙。
AC比亞迪克欠支援
AC近期聯賽收穫2連勝，不過睇真啲，2仗對手布雷西亞同維羅納都係今季新升班球隊，實力有限，而且「紅黑軍團」2仗都只係僅勝1比0，上仗仲要靠12碼先贏到波，表現差咁啲說服力。新帥甘柏路似乎未度掂進攻乏力嘅問題，陣中雖然有上季斬獲22球嘅波蘭射手比亞迪克壓陣，可惜此子缺乏隊友支援，一丁友做箭頭孤立無援腳風亦唔順，想睇佢做出標誌性舉雙槍嘅慶祝入波動作有啲難度。好彩AC近3仗只失1球，全開2球或以下，後防夠硬凈，呢場料都會踢返穩守戰術，唔會畀國米有機可乘，細盤好路。