洛佩特吉倒戈大報復
周一凌晨西甲壓軸大戰，西維爾主場惡鬥皇家馬德里。西維爾今季喺前皇馬主帥洛佩特吉帶領下，表現更上一層樓，呢名前國家隊主帥上季喺皇馬慘食無情雞，今次強勢倒戈定必大打爭氣波，何況呢隊波近年主場恰慣皇馬，受讓平半必捧下盤。
（Now 632及611周一凌晨3時直播）
未計周日凌晨賽果，西維爾開季4戰3勝1和排榜首，皇馬則以2勝2和排第3，論整體表現，西維爾聯賽4戰僅失1球，比起皇馬場場有失波、加埋失6球，西維爾明顯穩定得多。而且西維爾啱啱喺歐霸盃作客大勝卡拉巴克3比0，相反皇馬作客巴黎聖日耳門卻慘吞3蛋，並恥辱性錄得全場零射門中龍，士氣、狀態高下立見。
近季主場聯賽交手贏晒
洛佩特吉上季接掌皇馬戰績低落，最終喺國家打吡慘敗1比5後被炒，不過呢段不快經歷似乎無損佢嘅教波信心，今季佢過檔西維爾，引入奧甘波斯、利古朗及祖安佐敦等猛將，火速融入球隊，盡顯執教功力；反而皇馬主帥施丹「魔法失靈」，新加盟嘅夏薩特、盧卡祖域、洛迪高高斯表現全喺水準之下，對呢支開始老化嘅球隊完全冇幫助。
更重要嘅係，西維爾主場稱得上皇馬凶地，「銀河艦隊」對上4季聯賽作客嚟到都要放低3分，以目前皇馬嘅狀態實在冇本錢讓波，下盤可放心捧場。