今晚英超頭場上演李斯特城主場鬥熱刺，李斯特城近年鬥Big6輸多贏少，好似上周末就被紅魔鬼曼聯打破今季聯賽不敗身，而且佢哋最近5次鬥熱刺輸足4次，今場唔使讓波都信唔過，平手盤捧客軍熱刺。
（Now 621及611周六晚7時30分直播）
「狐狸」李斯特城近年陣中出現唔少好球員，中前場有占美華迪、占士麥迪臣及泰利文斯，防守就有丹麥門神卡斯柏舒米高，不過「桐油酲始終係裝桐油」，李城近年拍埋Big6完全未夠班，連同上個禮拜作客輸畀曼聯0比1，李城近8次鬥Big6只得1勝3和4負，當中熱刺更加可以講係佢哋頭號剋星，對上5次碰頭熱刺贏咗4次，合共轟入17球，淨係哈利卡尼及孫興民已包辦咗10球，簡直當李城後防冇到。
孫興民復任正選有火
熱刺周中歐聯作客奧林比亞高斯雖被逼和2比2，不過孫興民只係後備落場20分鐘，相信今場可復任正選，呢名南韓國腳上個禮拜鬥水晶宮梅開二度，帶領球隊大勝，但係周中依然未能博取主帥普捷天奴信任僅做後備，谷埋谷埋今場隨時大爆發，信往績捧熱刺。