今周法甲壓軸重頭戲，里昂主場硬撼巴黎聖日耳門（PSG）。PSG上周中歐聯冇「進攻3叉戟」依然大勝皇馬3比0，今場有尼馬復出相信鋒力會更上一層樓；里昂一對箭頭穆沙迪比利及迪比亦狀態大勇，而且佢哋近年主場鬥PSG表現分外醒神，有本錢鬥攻，今場中位數3.5球照捧大盤。
（myTV Gold 302、Now 639、有線615及655台周一凌晨3時直播）
PSG上場歐聯喺尼馬停賽、基利安麥巴比及卡雲尼養傷情況下，憑迪馬利亞梅開二度及梅尼亞埋齋以3比0擊潰對手，士氣、狀態有保證；今晚尼馬重披戰袍，呢名巴西王牌上場對斯特拉斯堡雖被主場球迷喝倒采，但最終仍喺補時階段倒掛妙射一箭定江山，盡顯個人級數，呢場波有佢夥拍弗到漏嘅迪馬利亞造波，相信莫路伊卡迪會有唔少入波機會。
穆沙迪比利迪比腳風順
里昂近況雖然麻麻，聯賽連盃賽已4場不勝，不過佢哋今季聯賽入咗12球，進攻火力卻係法甲之冠，當中一對箭頭穆沙迪比利及迪比包辦當中9球，腳風大順，而且里昂近年主場鬥PSG經常踢出超水準，近6次聯賽攞到4勝1和1負，有心理優勢下唔怕同PSG鬥攻。記得PSG上季頭20輪聯賽累積18勝2和，氣勢一時無兩，但去到第21輪作客里昂卻輸1比2，聯賽不敗身被打破，PSG當然希望報番一敗之仇，以兩軍進攻火力，相信會有唔少入波出現，中位數調高至3.5球都冇有怕，照捧入球大。