紅魔天殘地缺
今晚英超頭場之一，「錘仔幫」韋斯咸於主場硬撼曼聯。「紅魔」依家傷兵成籮，連超新星丹尼爾占士都傷埋，主帥蘇斯克查牙痛咁聲，而且作客聯賽已經6個月未贏過，加上韋斯咸近年主場對曼聯特醒，仲有得受讓必捧讓球主勝。
（Now 621周日晚9時直播）
曼聯雖於上場聯賽險勝李斯特城1比0，終止3場不勝頹勢，但入球只係靠拉舒福特操刀嘅12碼。事實上，「紅魔」全場組織混亂，明顯同保羅普巴、安東尼馬迪爾等中前場主力養傷有關，目前佢哋依然仲未康復，今仗好大機會冇份上陣。好衰唔衰，季初頻有進帳嘅超新星丹尼爾占士，因傷呢幾日都冇操練，好大機會倦勤，中前場可謂天殘地缺，主帥蘇斯克查巧婦難為無米之炊。
曼聯作客有心魔
除此之外，曼聯另一大問題係客場堅曳，自3月中起，跨季近6場作客聯賽，只得3和3負，即係6個月作客聯賽未贏過，似乎有一種「客場心魔」困擾住佢哋，總係一離開主場就冇晒信心。
另一邊廂，韋斯咸自首輪慘吞曼城5蛋後，逐漸重拾佳態，近5場取得3勝2和，而且連續3場保持清白之身，主帥比歷連尼刻意變陣451陣式，係成功鞏固防線嘅關鍵。隨住耶莫蘭高、蘭仙尼等傷愈復出，令箭頭施巴斯坦賀拿唔愁冇打反擊機會，呢位新兵今季已入3粒。如果韋斯咸今仗贏波嘅話，比帥就會成為英超時代首位擊敗4名唔同紅魔教頭嘅主帥，佢無論執教曼城定韋斯咸，之前曾帶隊贏莫耶斯、尹戈爾及摩連奴3名前紅魔教頭，若果贏埋「蘇B」就威到盡。況且「錘仔幫」近5次聯賽喺主場迎戰曼聯，取得2勝2和僅1敗，主場威力唔講得笑，仲有得受讓咁筍，讓球主勝咪錯過。