科里斯回巢屈福特大無畏
今晚英超上演「藍黃」對決，由「藍月亮」曼城喺主場迎戰「大黃蜂」屈福特，亦係兩軍西班牙教頭哥迪奧拿與科里斯正面交鋒。曼城上仗聯賽大意輸波，今仗不容再失必火力全開，但屈福特遇強都唔做縮頭烏龜，加上近年碰頭例演入球騷，3.5球嘅入球大有買趁早。
（Now 621周六晚10時直播）
哥迪奧拿出身自巴塞隆拿，科里斯曾執教華倫西亞、馬體會及愛斯賓奴等西甲球隊，兩名西班牙主帥均崇尚進攻足球。哥迪奧拿麾下嘅「藍月亮」開季5場聯賽合共狂轟16球，比「1哥」利物浦仲多1粒，總入球全開4球或以上。除咗箭頭阿古路場場有士哥之外，史達寧於聯賽亦有5球進帳，奇雲迪布尼與大衞施華則合共交出9個助攻，仲有馬列斯愈踢愈好，於周中歐聯贏薩克達有入波兼助攻，火力強勁。
費蘭甸奴客串中堅勁牙煙
不過曼城守將拿樸迪因傷長抖，史東斯夥拍奧達文迪扼守中路堅牙煙，上場聯賽作客諾域治爆冷輸2比3，今仗連史東斯都傷埋，焗住要搵費蘭甸奴客串中堅，穩健度始終差啲。
開局曳爆嘅屈福特，早前怒炒主帥查維加西亞，並邀請科里斯回巢掌舵，上場聯賽對住勁旅阿仙奴，喺一度落後2粒之下仍大舉進攻，全場攻門多達31次，最終連追2球打和2比2，士氣大振，亦證明科里斯就算遇強都唔玩死守。何況雙方近6次交手，有5次總入球開4球或以上，包括上屆英足盃決賽曼城狂數6比0，今場捧3.5球嘅大盤最好路。