昔日英國著名作家狄更斯，以上世紀法國大革命為背景、描述當時英國黑暗時期嘅長篇小說《雙城記》，成為世界文學經典名著之一，放諸依家百花齊放嘅英超，今晚亦有「雙城會」值得留意。首先係頭場首「城」，李斯特城主場對熱刺，熱刺於周中歐聯領先2粒下，竟被奧林比亞高斯逼和2比2，耗力不小卻失分而回，都咪話唔傷，相反李斯特城開季至今僅1敗，而且有地利兼以逸待勞，平手盤可謂坐和可贏。
至於另一「城」──曼城主場對屈福特，雖然曼城上場聯賽爆冷輸畀諾域治，但查實表現唔差，只係射極都唔入，反而諾域治例不虛發，可見嗰日曼城都係輸畀幸運之神，今鬥屈福特不容再失，讓到2/2.5球都冇有怕。
周日社區盃記得捧場
不得不提嘅，係聽日有由香港足總與馬會合辦嘅社區盃，呢項結合足球及慈善元素嘅賽事，並且別開生面，加插一場香港騎師隊對香港名宿隊，騎師隊有潘頓、莫雷拉等著名騎師悉數上陣，名宿隊更有最好波嘅「50後」劉榮業、陳發枝，同最好波嘅「60後」山度士登場，咁有意義嘅慈善賽，記得聽日下午3點去旺角場捧場喇。