後衞失魂頂唔住紅軍
今晚英超上演紅藍大戰，由車路士主場對利物浦。車仔今季全面革新，幾名新星都打出名堂，但演出唔穩定始終係致命傷，防線守將輪流甩轆，導致失球數字高企，今晚面對火力強勁嘅利物浦，相信會有唔少入球出現，中位數2.5球嘅大盤值得捧場。（Now 621及611周日晚11時30分直播）
車路士今季被罰冇得買人，但卻可謂因禍得福，因為短時間內已經打起咗幾件自家製產品，射手譚美阿巴謙今季已取得7個入球，領隊林柏特「契仔」美臣蒙特亦有3球進帳兼入選國家隊，而最新上位嘅球員係後衞湯姆利，呢3位21歲以下嘅球員相信會成為未來英格蘭國家隊嘅中流砥柱。
雖然車仔進攻夠晒悅目，但係防線就似乎畀唔到人信心，尤其係主將尼高路簡迪受傷後，中場嘅保護明顯唔夠，所以「林伯」近兩仗索性踢回干地執教時期採取嘅343陣式，希望以人數壓縮空間，彌補防守上嘅失誤，令葛特蘇馬、安達斯基斯坦臣等成日「派膠」嘅球員冇咁大壓力。可惜「林伯」呢招似乎亦唔多奏效，車仔今季所有賽事場場有失波，聯賽失球率亦僅次於諾域治，實在濕滯。
文尼腳風順到暈
利物浦同車仔雖然同樣喺上周中進行嘅歐聯失利，不過聯賽至今一直保持高水平，連勝紀錄已去到跨季嘅14連勝，打破球會紀錄；「埃及文明」至今保持高入球率，加埋已取得10個入球，尤其係沙迪奧文尼可謂腳風超順，絕對係「藍戰士」今場心腹大患。
兩隊曾於今屆歐洲超級盃相遇，當時車仔佔盡優勢，最終加時打和2比2，互射12碼落敗，不過嗰場波競爭性唔算強，利物浦亦畀人留有一手嘅感覺，相信今次交手會激烈好多，暫時2.5中位數入球大略嫌太熱，可等開波後升番高水再分段吸納都未遲。