射手當弗連續15場士哥
美職鬥到去最後直路，各隊都要為爭入季後賽努力，同時神射手之爭亦都好激烈，今日阿King就搵射手榜領先嘅3位球員所效力嘅球隊做度波起點，再綜合埋常規賽形勢，介紹條美職3串1畀大家。最好路係阿特蘭大聯主勝，佢哋嘅射手祖斯夫馬天尼斯連續15場聯賽有波入，弗到冇朋友，主場對聖荷西地震必全取3分。
（myTV Gold 302、Now 639、有線655及615台周日凌晨3時30分直播）
祖斯夫馬天尼斯現時以26個入波，同洛杉磯銀河嘅伊巴謙莫域並列射手榜次席，至於阿特蘭大聯喺東岸排第3，落後榜首嘅紐約城6分，比「二哥」費城聯只少1分，爭第2甚至東岸冠軍唔係冇價講。委內瑞拉前鋒祖斯夫馬天尼斯連續15場有波入，合共射入21球，挾呢個驚人紀錄，肯定可以幫球隊全取3分。
銀河衝擊季後賽 伊巴必搏
至於伊巴効力嘅洛杉磯銀河就主場出戰蒙特利爾衝擊，銀河現時排西岸第5，只比排第8嘅波特蘭伐木者多2分，至於衝擊就排東岸第9，同第7嘅新英倫革命只差3分，雙方都要為季後賽席位努力，銀河近6仗主場5次開4球或以上，火力全開，今仗隨時再演入球騷。
（myTV Gold 301、Now 638、有線654及614台周日早上10時30分直播）
最後講埋場FC洛杉磯對FC多倫多。FC洛杉磯前鋒卡路士韋拿以28球暫時領先射手榜，但球隊已經提早奪得西岸冠軍，餘下賽事唔使太搏命，事實上佢哋聯賽已經4場不勝，FC多倫多或有機會偷雞，讓球客勝捧得過。（myTV Gold 302、Now 639、有線655及615台周日早上10時30分直播）
最長入波紀錄僅次美斯
美職7月最佳球員、阿特蘭大聯神鋒祖斯夫馬天尼斯，先喺8月23號對奧蘭多城嗰陣，創造連續12場聯賽入波新紀錄，到咗9月18號贏FC辛辛那提場波，進一步將個連續入波紀錄擴展至15場共入21球，成為僅次於美斯（21場33球），拍住挪威球員咸利（15場21球），喺最長連續建功世界紀錄榜排第3位，而且今場有望升上次席。其實呢位26歲委內瑞拉國腳，曾經喺44場聯賽內6次連中三元，都係一項美職紀錄。