周末德甲雲達不來梅主場迎戰RB萊比錫，不來梅開季後一直受傷兵問題困擾，到今仗賽前傷停問題進一步加劇，今晚起碼有9名主力戰將缺陣，尤其防線天殘地缺，好難抵擋質高態勇嘅「一哥」萊比錫，萊比錫讓半一，黑柴撐上盤。
（Now 672、FOX+、有線613及653台周日凌晨零時30分直播）
基於未開季防線就有多名主力受傷，不來梅喺轉會窗關閉前，已先後向多蒙特同慕遜加柏借得後衞奧馬托柏克同米高蘭治應急，可惜傷兵問題好似傳染病咁無法壓止，現時陣中守將奧古斯天臣、施巴斯坦蘭甘、摩辛達、維爾高域、奇雲莫華特同借番嚟冇耐嘅奧馬托柏克都要養傷，連近期狀態大勇嘅日本攻擊手大迫勇也亦整親大腿加入傷兵行列，加上長抖中嘅巴迪爾斯同上仗被逐要停賽嘅中場大將紐尼沙軒，最少9名主力缺陣。更甚嘅係，今晚預計嘅正選陣容中，包括艾格史甸兄弟、謝比施拿斯同卡拉臣都有輕傷在身或啱啱好番，未必可以交出100%體能狀態迎強敵。
萊比錫歐聯客勝顯級數
萊比錫喺新帥拿高斯文帶領下愈戰愈勇，上輪聯賽逼和回勇嘅班霸拜仁，演出固然具說服力，周中歐聯作客葡萄牙殺敗賓菲加更顯級數，射手迪姆華拿已證明擁有頂級潛質。今晚除箭頭尤素夫保臣因為做第一任爸爸好大機會得到休息外，基本上可以強陣出擊，黑柴相信佢哋可以攻陷殘陣嘅不來梅。