力爭意甲9連霸嘅祖雲達斯今晚主場出擊，出戰升班球隊維羅納，祖記上場聯賽失分，今場定必喪攻對手，以佢哋近12次鬥維羅納取得9勝2和1負嘅壓倒性優勢，贏2球係基本消費，讓球半、兩球照捧上盤。
（myTV Gold 301、Now 638、有線614及654台周日凌晨零時直播）
祖記上場聯賽作客0比0打和費倫天拿，衞冕之路遇上小波折，而且周中歐聯作客馬德里體育會亦踢成2比2，連續2場贏唔到，不過「斑馬軍團」今季兵源雄厚，人腳足以排出兩個具有爭標實力嘅正選11人，今返主場為重返勝軌，肯定加多兩錢肉緊，決心唔需要懷疑。
對賽往績恰死維羅納
上季意乙排第5、憑附加賽攞到升班資格嘅維羅納開季演出平平，3場聯賽只係贏過同屬升班球隊嘅萊切，最弊係陣中前鋒史迪賓斯基上場對AC米蘭領紅牌被逐，今場需要坐波監，想偷雞更難上加難。維羅納近年可以講係祖記「私房菜」，對上12次交鋒維羅納只得1勝2和9負，當中近4次作客有3次輸2球或以上，祖記今場讓球半、兩球冇有怕，一於捧上盤。