主場出擊冇甩拖
周中西甲快車連場激戰，其中周三凌晨巴塞隆拿主場同維拉利爾上演焦點戰。爭取衞冕嘅巴塞今季開局令人大跌眼鏡，好彩主場出擊表現依然有保證，為重回勝軌今仗肯定搶攻，半場主勝值得留意。
（Now 611及632周三凌晨3時直播）
力爭3連冠嘅巴塞，今季衞冕之路起步就遇上唔少阻滯，繼開咧戰0比1作客不敵畢爾包之後，上仗作客再以0比2輸畀今季重返西甲嘅CF格蘭納達，開咧冇耐就慘吞2敗，創下主帥華爾維迪上任以嚟最差聯賽開局。為免進一步畀馬德里體育會同皇家馬德里等爭冠對手拋離，今場必定搶攻。
好彩過去兩季巴塞喺聯賽統治級表現，今季仍然可以喺主場見到，近2仗聯賽主場面對貝迪斯同華倫西亞，巴塞都以5比2雷霆萬鈞之勢擊敗對手，可見呢支坐擁基沙文、蘇亞雷斯同法蘭基迪莊等頂級球星嘅西甲班霸，整體質素依然超班，加上頭號球星美斯康復之後，已逐漸揾番比賽狀態，今仗由佢領軍，巴塞戰力值得期待。
維拉利爾對賽多捱打
收穫聯賽2連勝嘅維拉利爾近況回勇，不過後防欠穩一直係困擾「黃色潛水艇」嘅一大難題，今季情況依然未見起色，難畀到球迷信心，尤其球隊近年都畀巴塞食住，近5次交手1和4負處於劣勢，其中4次半場就已經落後。今次面對急需一場大勝重振雄風嘅巴塞，維拉利爾隨時由頭輸到落尾，一於捧巴塞半場主勝。