傳控戰術未Run熟
今晚意甲快車尾場，祖雲達斯作客升班球隊布雷西亞。祖記由沙利接手後冇晒霸氣，佢嘅傳控戰術令進攻火力比上季略減，作客破密集嘅板斧亦唔多，之前聯賽對帕爾馬亦只能小勝，料布雷西亞今場擺鐵桶陣迎敵，捧中位數2.5/3球入球細。
（myTV Gold301、Now 638、有線614及654台周三凌晨3時直播）
意甲8連冠嘅祖雲達斯，今夏有功勳主帥阿里基離隊，改由前車仔主帥沙利接手。沙利崇尚傳控戰術，利用不斷傳球撕破敵軍防線，需要球員不停走動，眾將需要時間適應，連同上仗主場以2比1險勝維羅納在內，已經34歲嘅C朗開季後只得2球進帳，中鋒文迪蘇傑更徹底被棄用，保羅戴巴拿狀態又未起，進攻效率明顯下降。
巴神復出孭起布雷西亞
事隔8季終重返意甲嘅布雷西亞，4場聯賽獲2勝2負，表現不過不失。今場布軍有中場迪辛拿刑滿復出，新加盟嘅箭頭巴洛迪利亦已坐完跨季波監候命，可以專心打防反，並非全無一戰之力。況且祖記作客不擅破鐵桶陣，翻查往績，「斑馬兵團」跨季近5場聯賽作客僅入2球，每場比賽總入球全開2球或以下，今場屬可勝不穩格局，客勝太熱唔抵玩，捧入球細好過。