另一場英聯盃第3圈大戰，阿仙奴主場鬥諾定咸森林。「兵工廠」踢法有前冇後，防線甩漏情況令球迷認真唔開胃，相反森林作為英冠前列分子，戰力不容忽視，呢場撐讓球客勝。
（周三凌晨2時45分開賽）
今季頻頻為球迷獻上入球大戰嘅阿仙奴，上仗聯賽喺主場面對新升班球隊阿士東維拉，可以話係贏得驚險。「兵工廠」上下半場兩度落後，仲有美蘭尼爾斯完半場前紅牌被逐要打少個，好彩反擊能力不俗，先有破球會轉會費紀錄嘅尼高拉斯比比12碼操刀得手，加盟後終於開齋，其後哥林張伯斯同奧巴美揚挺身而出各建一功，最終以3比2反勝維拉。雖然「兵工廠」贏波後升上聯賽第4，不過計埋上仗聯賽，阿仙奴今季3仗主場都有失波，可見後防不穩嘅問題依然未解決。
森林今季喺前雷恩主帥林武治帶領下，表現夠硬淨，各項賽事近9仗未輸過之餘，而且只係失過4球，包括早前1比0擊敗英冠前列分子史雲斯，士氣高昂。況且阿仙奴嚟緊英超即將要作客硬撼Big6勁敵曼聯，為留力應付硬仗，呢場隨時會派副選應戰，加上射手拿卡錫迪有傷倦勤，戰力難免受損，森林隨時有機可乘，讓球客勝值博。