英聯盃今明兩晚上演第3圈比賽，力爭3連霸嘅曼城衞冕第一擊將會作客英冠球隊普雷斯頓。曼城前線人才鼎盛，不過後防因為傷兵問題人腳捉襟見肘，對住近況唔錯嘅英冠3哥普雷斯頓，相信會有唔少入波出現，中位數3.5球大盤好路。
（周三凌晨2時45分開賽）
曼城啱啱喺聯賽8比0大炒屈福特，開波頭18分鐘已轟入5球，破晒英超紀錄，氣勢一時無兩，雖然哥迪奧拿慣性喺英聯盃大幅換輪，不過佢哋後備席上有加比爾捷西斯、根度簡、祖奧簡斯路、辛真高等國腳級人馬，戰力唔會差得去邊，而且季初大勇嘅史達寧上場冇落場，今場有機會擔正，進攻火力絕對有保證。
不過曼城今場都有一定隱憂，一對中堅史東斯及拿樸迪繼續倦勤，哥迪奧拿上場已搵費蘭甸奴夥拍奧達文迪扼守中路，能夠保持不失只因屈福特鋒力太弱及把握唔到。普雷斯頓現時喺英冠排第3，只比榜首列斯聯少1分，表現穩定有力衝擊升班資格，而且佢今季8場聯賽入14球，係英冠入球第2多球隊，加埋盃賽佢哋今季5場主場比賽攞到4勝1和，並非任人魚肉，乘曼城後防唔齊腳入到波唔奇，捧大盤穩陣。