30歲對唔少球員嚟講係一個分水嶺，踏入「3字頭」就會被開始視為老將，狀態、身價都必定向下滑，不過對於瑞典神鋒伊巴謙莫域嚟講，年齡根本完全唔係問題，甚至有數據顯示，伊巴謙莫域踏入30歲之後，入球數字及入球率反而大大提升，真係愈老愈可愛！
現年37歲嘅伊巴謙莫域，上場美職入波，係佢30歲之後第300個入球，統計顯示佢30歲生日前，上陣525場攻入232球，場均入球率為0.44球，但30歲之後踢371場就入300球，場均入球率急升至0.81球，認真誇張呀！
伊巴謙莫域30歲前，效力馬模、阿積士、祖雲達斯、國際米蘭同巴塞隆拿，並且喺AC米蘭度過30歲生日，之後就踢巴黎聖日耳門、曼聯同埋洛杉磯銀河。唔少球迷會認為，伊巴謙莫域臨老去美職「刷數據」，但查實佢喺聖日耳門嘅時間已經大豐收，4季喪入156球，今季佢喺美職射入27球，亦刷新咗銀河喺美職個人單季聯賽入波最多紀錄，淨係近2場鬥肯薩斯體育會及蒙特利爾衝擊已經入4球，協助球隊取得2連勝。
銀河訪鹽湖城大盤要跟
周四早上銀河作客鬥皇家鹽湖城。兩隊目前仲未穩入季後賽，呢場一樣要搏盡，既然伊巴謙莫域近期狀態弗到漏，皇家鹽湖城近5場主場贏4場，水準亦好穩定，今場捧3/3.5球大盤最穩陣。
（myTV Gold 301、Now 638、有線654及614台周四早上9時30分直播）