新兵對辦 意甲豪取4連勝
周四凌晨意甲快車焦點戰，國際米蘭主場火併拉素。國米開季成績理想，幾位新兵表現對辦迅速融入球隊，足見新帥干地教波功架，況且拉素作客表現麻麻，面對實力强勁嘅「藍黑兵團」恐難全身而退，主勝係不二之選。
（MyTV Gold 301、Now 638、有線614及654台周四凌晨3時直播）
國米上仗喺米蘭打吡戰大踢爭氣波，2比0擊敗同城死敵AC之後，聯賽開季4連勝，高踞積分榜首，可見鐵帥干地接手後，球隊鬥志有明顯提升。
尤其一班新兵夠搶鏡，其中比利時前鋒盧卡古由曼聯來投之後，4仗聯賽斬獲3球，包括上仗首次出戰米蘭打吡就有波入，已經成功擔起進攻大旗，另外史提芬奴辛斯亦成功靠出色表現，喺競爭激烈嘅國米中場搶到一席之地，加上經驗豐富嘅鐵衞高甸已經傷愈復出，球隊整體實力有望進一步提升。
拉素作客連遭反勝洩氣
拉素上仗雖然以2比0擊敗帕爾馬，終止2連敗頹勢，不過作客表現依然難給予球迷信心，繼早前聯賽不敵史帕爾之後，上場作客再喺歐霸分組賽輸畀克盧日，而且兩次都畀對手反勝，球隊信心跌落谷底，呢場要同氣勢如虹嘅國米搶分都幾難，一於捧主勝。