今晚續有英格蘭聯賽盃第3圈賽事，輪到英超「1哥」利物浦登場，作客英甲中游分子米爾頓凱恩斯。「紅軍」一向劍指聯賽及歐聯錦標，近年於本土盃賽例出副選，爭勝心不足，而且「埃及文明」鋒線今仗好大機會休息，初段隨時老鼠拉龜冇碇埋手，半場和值得捧場。
（周四凌晨2時45分開賽）
利物浦一向對英超冠軍恨到流晒口水，而歐聯亦同樣重要，因此近年於本土盃賽多以副選出戰，尤其係英聯盃，已經連續2季喺第3圈輸畀英超隊伍出局，就算之前數季面對卡素爾等低組別球隊，利物浦亦要踢至加時、甚至互射12碼先晉級。單計近4季英聯盃首戰，利物浦喺法定時間只得1勝1和2負，爭盃決心唔大，其中3次開出半場和，與派大批副選、實力受削有關。
此外，紅軍上場聯賽以2比1險勝車路士，耗力不小，今場或收起「埃及文明」鋒線穆罕默德沙拿、沙迪奧文尼及羅拔圖法明奴，啱啱失落世界足球先生嘅鐵衞華基爾雲迪積克亦好大機會唔踢，今仗或要用到久疏戰陣嘅梳頓沙基利、拉爾拉拿、洛夫雲等，實力差一大截。
米爾頓凱恩斯盃賽有驚喜
另一邊廂，米爾頓凱恩斯喺英甲主場6戰3勝3負，成績雖然一般，不過近年喺英聯盃曾經爆出超級冷門之役；2014-15年度球季，佢哋喺主場以4比0大炒當時由尹戈爾執教嘅曼聯。如今利物浦對待英聯盃爭勝心不足，米爾頓凱恩斯隨時再爆驚喜，「紅軍」想喺上半場取得領先確有難度，半場和不妨再追。