賓施馬撻着狙擊奧沙辛拿
周四凌晨西甲快車連場激戰，其中皇家馬德里主場鬥奧沙辛拿。皇馬前鋒賓施馬開咧腳風奇順，成為「銀河艦隊」搶分關鍵，配合加里夫巴利同夏薩特等一班頂級球星為佢輸送彈藥，皇馬足以攻破任何防線，對住新升班嘅奧沙辛拿肯定唔會手軟，中位數3.5球入球大好路。
（Now 632周四凌晨3時直播）
皇馬上周中歐聯出師不利，以0比3不敵巴黎聖日耳門，好彩「銀河艦隊」眾星返回聯賽即刻踢出身價，其中賓施馬喺上仗聯賽作客西維爾一仗嘅頭槌入波，就為皇馬搶到寶貴3分，令飽受批評嘅主帥施丹總算鬆一口氣。呢位法國射手今季成功擔起皇馬進攻重責，5場聯賽斬獲5球，射手本色返晒嚟。隨住比利時球星夏薩特逐漸融入球隊，再搭住解凍之後狀態大勇嘅「大聖爺」加里夫巴利，皇馬豪華進攻線勢必愈戰愈勇，表現值得期待。
奧沙箭頭艾維拉爛砌
今季重返西甲嘅奧沙辛拿季初令人眼前一亮，5輪過後成為皇馬同畢爾包之外另一支不敗之師，當中曾經交出2比2逼和勁旅巴塞隆拿嘅好戲，表現夠硬淨。奧沙辛拿箭頭艾斯基爾艾維拉出名死纏爛打，對住強隊都唔會腳軟，經常畀佢偷雞博到入波機會，皇馬班後衞如果稍有唔集中，隨時釀成大錯。況且皇馬近8次聯賽同奧沙辛拿交手，有7次開4球或以上，預計今場入球騷走唔甩，中位數3.5球入球大值得捧場。