今晚意甲頭場，「2哥」祖雲達斯喺主場迎戰史帕爾。祖記有王牌C朗傷愈復出，佢喺啱啱嘅世界足球先生選舉只得第3，谷埋成肚火，正好當史帕爾係沙包咁出氣，不過近期防線唔多穩陣，捧2.5球嘅入球大更穩陣。
（myTV Gold 301、Now 638、有線654、614、661及601台周六晚9時直播）
祖記王牌C朗一向係各項頒獎禮常客，但日前國際足協頒獎禮佢稱傷未有畀面出席，最終喺世界足球先生選舉只得第3名，就算係預咗冇份，但不嬲要面唔衰得嘅佢一定條氣唔順，近日呢位射手已好番兼訓練，似乎已經做好「開火」準備。今季喺功勳主帥阿里基離隊後，祖記請嚟前車仔主帥沙利執教，其打法以進取見稱，近5場有4次開3球或以上，C朗梗係like爆喇，近2次喺地頭出擊皆有士哥外，前仗聯賽鬥維羅納，更交出助攻畀首次正選上陣嘅艾朗藍斯建功，因傷抖咗1場即復出，攻力有保證。
不過祖記防線難言穩陣，尤其係兩位中堅新援馬菲斯迪歷特及美列迪美羅，明顯仍未適應意甲踢法，經常出現甩漏情況，其中新星馬菲斯迪歷特更被寸為「荷蘭菲爾鍾斯」，信心唔夠易出事。
史帕爾防守能力差
另一邊廂，史帕爾防守能力相當差，聯賽連盃賽近6場都有失波，其中5場開3球或以上，包括近2仗聯賽對萊切同薩斯索羅失咗6粒，今場都係死路一條。但主W賠率冇肉食，而祖記下周中又有歐聯跟尾，讓球主勝要讓到2球咁辣，又略嫌過火得滯，不如轉捧2.5球嘅大盤好過。