德甲「2哥」拜仁慕尼黑今晚同萊比錫同時出師，作客對包緊尾嘅升班球隊柏達邦，不過考慮到佢哋3日後要喺歐聯作客倫敦火併熱刺，今場作客讓到兩球半、三球有啲風險，預期教練尼高高華會採取速戰速決策略，遇上習慣開波即搶攻嘅急先鋒柏達邦，相信上半場已經好多波入，今場推介中位數球半、兩球嘅半場大盤。
（Now 672、FOX+、有線653及613台周六晚9時30分直播）
經過季初慢熱後，拜仁近期狀態終於到位，近5場正式比賽有4場大炒對手，只有作客賽和萊比錫例外，但該役兩雄相遇佢哋表現亦相當出色，拜仁神鋒羅拔利雲度夫斯基今季5場德甲場場有波入共入9球，強勢沒法擋，尤其近兩輪聯賽對萊比錫同科隆，兩場波都喺開波3分鐘即入波，足見佢對爭取入波有幾咁飢渴！
柏達邦雖然包尾，但崇尚進攻，教練史堤芬包姆加特賽前揚言，面對拜仁死守一定瓜，今晚會喺全場爆滿嘅主場球迷面前同拜仁鬥攻，以全取3分為目標。柏達邦今季5場聯賽都入得又失得，當中更有4場喺頭15分鐘內取得入球，絕對係德甲急先鋒，今晚擺明想同拜仁鬥快入波！