川崎神戶癲鬥癲
講到周六日職重頭戲，必屬川崎前鋒主場迎戰神戶勝利船，事關兩隊波打法大開大合，神戶個「VIP組合」又重出江湖，必然會係一場癲鳳鬥狂龍嘅入球大騷。
（有線662及602台周六下午4時直播）
前鋒現居第4位，落後榜首FC東京8分，成功衞冕嘅機會難以樂觀，反而爭取入前3名、搶來屆亞冠盃入場券更實際，今場一定搏殺。佢哋兩隊本月中喺日皇盃碰頭，當時前鋒收起攻擊主力中村憲剛、小林悠，咁啱大島僚太、齋藤學又跛咗，搞到半場落後兩球，易邊後至放佢兩個出嚟，可以話自己玩死自己，雖然喺0比3劣勢下連追2球，可惜為時已晚，輸2比3被擯出局，今場冤家路窄，中村憲剛、小林悠肯定擔正，前鋒自然渴望報番一箭之仇。
近8次交手炮製31球
無疑神戶喺日皇盃贏到前鋒，確實都唔係用至強陣容，韋拿休戰，恩尼斯達養傷，但係中後場有齊華美倫、山口螢、沙治森柏同酒井高德，耳仔做手術養病3個半月嘅普多斯基亦喺末段披甲，平均人腳秤先過前鋒，不過咁都畀前鋒追番兩球，後防真係令人不敢恭維。無可否認， 神戶季中羅致埋酒井高德之後，本土球員同外援嘅溝通、配合得更好，的確改善咗戰績，今場更盛傳恩尼斯達傷愈，可以拍住韋拿及普多斯基，前者喺上場聯賽贏松本山雅一役亦有進帳，「VIP組合」加埋狀態大勇、近5場轟入4球嘅土炮鋒將古橋亨梧，絕對有條件同前鋒對攻，只係怕前面入埋唔夠後面輸啫。
事實上，雙方近8次交手合共炮製31個入球，當中7次開3球或以上，就證明咗呢一點，今場撐大盤（2.5球）最明智。