紀律至上Vs進攻單一
周日凌晨西甲焦點戰一觸即發，馬德里體育會將會主場同皇家馬德里上演同城打吡。馬體會經歷大換血之後，球員仲需要時間磨合，尤其進攻效率有待提高，而皇馬攻擊手段亦極為單一，為免過早失球陷入被動，兩軍開局料會謹慎行事，半場和係好路。
(Now 611及632周日凌晨3時直播)
馬體會保守
限制祖奧菲歷斯
上季冠軍巴塞隆拿開咧頻頻甩轆，令馬德里雙雄坐享漁翁之利齊齊攀上積分榜前列，為咗進一步拉開領先優勢，兩軍都都會想係呢場大戰中脫穎而出。馬體會今季除咗有鐵衞高甸同菲臘路爾斯等後防主力離隊之外，前場進攻核心基沙文都選擇他投，陣容變動頗大，為補充新血，球隊以天價引入「新C朗」祖奧菲歷斯，呢位葡萄牙新星天賦異稟，為前場進攻增添唔少創作力，可惜主帥施蒙尼所崇尚嘅踢法極具紀律性，反而局限祖奧菲歷斯嘅進攻潛力，拖累馬體會進攻效率，佢哋近3仗聯賽就有2次食白果，鋒力認真麻麻。
歐聯慘敗後
皇馬防線大改進
力爭重奪西甲冠軍嘅皇馬，今夏雖然引入夏薩特增强攻擊力，可惜比利時球星啱啱傷愈復出，未重回巔峰狀態，縱使賓施馬開季頻頻搶士哥，不過法國前鋒以一己之力帶領皇馬前進嘅同時，亦暴露出球隊進攻手段單一嘅問題。好彩皇馬經歷早前歐聯0比3慘敗巴黎聖日耳門一仗之後痛定思痛，大大改善防守表現，繼1比0擊敗西維爾之後，上仗再以2比0輕取奧沙辛拿，連續2場力保不失。加上馬德里雙雄近5次聯賽交手4次半場打成平手，今仗開局戰況隨時再陷入膠着，半場和值得再追。