欖球世界盃目前喺日本舉行，當地人都沉醉喺呢項賽事，但係周六晏晝有場日職賽事成功搶Fo，預料入場觀眾超過4萬，就係「大阪打吡第38回」——大阪櫻花主場硬撼大阪飛腳。
（有線662及602台周六下午1時直播）
呢場關西內訌唔只關乎勝負，更加係兩隊面子問題。季中加盟飛腳嘅前國腳宇佐美貴史都直認不諱，呢場波唔只3分咁簡單。
櫻花守強飛腳攻弱
目前位居聯賽第6位嘅櫻花中前場傷兵滿營，除咗前鋒都倉賢養傷提早收咧，西本雅崇、藤本康太、高木俊幸及清武弘嗣都未康復，首席射手之一嘅巴西箭頭般奴文迪斯，又自7月中就陷於入球荒，的確缺少必勝把握。況且，翻查以往37場聯賽打吡往績，櫻花咁耐只得9勝5和23負，最慘係近8次交手冇贏過飛腳不特止，仲要4連敗，讓波確實唔抵捧。
長期徘徊下游嘅飛腳今季重用新人，但係顯然有啲揠苗助長，導致表現反覆，搞到依家處於護級漩渦邊緣，只係多尾3嘅鳥棲砂岩4分，隨時落埋水。因為咁，佢哋一定搏命搶分。問題係飛腳埋門比較差，教頭宮本恒靖亦坦承櫻花防守硬凈，點樣攻得入去都幾頭痛吓。加埋聯賽入咗5球嘅中場小野瀬康介坐波監，飛腳守住唔輸唔奇，要贏就抆抆哋，所以投注首選一定係中位數2.5球嘅入球細。