喺周中聯賽盃大炒乙組仔甘士比7比1嘅車路士，重回英超戰場，會喺史丹福橋球場迎戰來訪嘅白禮頓。車仔喺少帥林柏特帶領下，以主攻打法刮起青春風暴，並打起中鋒譚美阿巴謙，可惜經驗不足場場有失球，喺急於主場開齋下隨時搶攻，捧2.5球入球大更佳。
（Now 622周六晚10時直播）
白禮頓傷兵成籮
車仔今季受禁買令困擾，少帥林柏特惟有靠小將打天下，最搶鏡當然係中鋒譚美阿巴謙，呢名上季協助阿士東維拉升班嘅小將，今季聯賽已有7球進帳，而且「林伯」偏重進攻打法，令「譚仔」如魚得水，中場美臣蒙特亦屢有佳作。車仔喺上場聯賽1比2不敵「1哥」利物浦，但全場表現不落下風，直至完場前都未有放棄，戰意十足。周中聯賽盃大炒乙組仔，「林伯」收起譚美阿巴謙同美臣蒙特，但車仔仍然有巴舒亞伊梅開二度，同赫臣奧杜爾入波，證明車路士大把進攻好料用。
但同時由於小將經驗不足，「林伯」嘅主攻打法亦減低咗防守穩健性，今季6場聯賽場場有失球共失13球，係車仔踏入英超時代後，頭6輪失波最多紀錄，中堅安達斯基斯坦臣今場因傷倦勤，防守進一步削弱。
另邊廂，白禮頓傷兵不少，巴洛根、艾斯基舒希洛圖及貝拿度費南迪斯等守將仍未康復，令防線不穩。翻查紀錄，雙方近3次聯賽交手，共炮製10個士哥，加上車仔今季6場聯賽，有5次開3球或以上，球隊希望打開聯賽主場勝利之門心切，必定搶攻，吼2.5球入球大啱數。