防線騰騰震睇定砌聖人
周六晚上英超仲有熱刺主場迎戰「聖人」修咸頓。聯賽頻頻失分嘅熱刺，首席門神洛里斯有傷在身未必披甲，為穩固防守，今場未必會踢得太進取，加上修咸頓作客向來鍾意拉布，造訪強敵唔敢亂攻，半場和值得捧場。
（Now 621周六晚10時直播）
熱刺今季表現飄忽，開咧6場聯賽僅取2勝2和2負，仲曾喺主場以0比1爆冷輸畀紐卡素。上場聯賽作客李斯特城雖然早早領先，不過比賽尾段連失2球最終反輸1比2，防守唔集中成為致命傷。除兩大比利時中堅維頓漢同艾達韋列特季初演出失準之外，哥倫比亞守將達雲臣山齊士都不時出現蝦碌場面，加上首席門神洛里斯近期受傷，未必趕及復出，隨時焗用後備門將加沙寧加把關，此子早前面對李城一仗甩手幾乎釀成大錯，好難畀到人信心。連同早前打吡戰2比2畀阿仙奴逼和，熱刺喺今季先入波嘅聯賽賽事，最終失咗5分，主帥普捷天奴為撥亂反正，必定更重視如何改善防守。
修咸頓作客玩拉布
經歷開咧2場敗仗之後，修咸頓表現漸入佳境，近4仗聯賽取得2勝1和僅1負。「聖人」踢法尤其注重穩中求勝，特別喺客場出擊，為免過早失波陷入被動，比賽初段經常玩拉布，近4場作客半場都同對手打和，表現非常謹慎，今場面對實力更強嘅熱刺必定照辦煮碗，半場和值得再追。