唔知點解，自從開始撰寫專欄後，所有僱主都要求我加入金句。老實講，每周都要拋出到肉又押韻嘅金句，並不容易，好彩我自小就養成閱讀習慣，亦鍾意睇電影，尤其係香港於殖民地時期，佢哋改戲名係非常精警，嗰陣除咗去現場睇波外，就係要靠聽收音機嘅電台評述球賽，講波佬嘅咬文嚼字比較有深度，耳濡目染之下，為我日後諗金句打好基礎。
不過世事好難兩全其美，既要用具押韻嘅字眼，又要與我畀嘅貼士完美配合，組成精警而有趣嘅金句，真係需要花心思。好似今晚英超，我睇中咗一場中下游對決，由水晶宮主場迎戰諾域治（城），後者防守太差，女班主表明無懼做升降機，最緊要打出精彩嘅足球，呢種拚死無大害嘅打法，要搶分護級非常蝕底，因此我寧願要「宮」唔要「城」，捧水晶宮更上算（Now 626周六晚10時直播）。由於我今個周末要帶隊遠征馬來西亞，打番場香港桂神好友隊對檳城體育會，所以冇得評述德甲，但同日嘅RB萊比錫對史浩克04亦屬勢均力敵之戰，值得留意。
李城曼城捧得過
再睇番今輪英超賽事，我就心儀「雙城記」，先講李斯特城主場對紐卡素，「狐狸」上季有泰國班主維猜不幸意外離世，幸好兒子徐盛源亦成功穩定軍心，開季表現穩步上揚，包括上仗聯賽反勝熱刺2比1，殺上前列，要贏紐卡素唔難（Now 621周日晚11時30分直播）。另外曼城作客愛華頓，呢支「2哥」畀利物浦甩開，實在再冇失分空間，造訪態沉嘅愛華頓，簡簡單單捧客勝。