法甲聯賽依家前7名只有3分差距，今季爭標肯定好睇過戲！搞到形勢咁混亂，最大原因當然係班霸巴黎聖日耳門（PSG）大跌Watt，以佢哋近期聯賽低沉演出，加上又有歐聯顧慮，今晚對住表現穩步上揚嘅波爾多，作客讓唔起一球/球半，下盤值得捧場。
（myTV Gold 302、Now 639、714、有線603、604、615及655台周六晚11時30分直播）
PSG早前喺歐聯首場分組賽以3比0大勝皇家馬德里，不過新加盟嘅阿根廷前鋒莫路伊卡迪傷出，連同之前受傷嘅卡雲尼及基利安麥巴比，令PSG大鬧前鋒荒，聯賽對斯特拉斯堡及里昂，都係靠尼馬完場前福至心靈建功險勝1比0，周中主場鬥蘭斯仲淨吞2蛋，吃下本季第2場敗仗，表現冇晒昔日霸氣。雖然基利安麥巴比據報已復操，但久疏戰陣狀態肯定唔弗，而且PSG下周歐聯分組賽將要作客「地獄球場」加拉塔沙雷，為免增添傷患，相信落場球員更會避重就輕。
波爾多自從揭幕戰輸畀昂熱後，聯賽已保持6場不敗，而且佢哋近年迎戰PSG經常打高一皮波，對上5次聯賽主場對賽攞到1勝2和2負，絕非冇還擊之力，以PSG近期狀態想淨勝2粒唔容易，作客讓一球/球半太多，波童今場揀下盤。
里昂南特開「大」片
至於較早開波嘅直播戲碼有里昂主場鬥南特，里昂周中作客比斯特喺兩度領先情況下，都被對手逼和2比2，再次暴露佢哋攻強守弱缺點；南特由老帥基斯頓哥古夫掌帥印後愈踢愈好，近5場聯賽贏4場，兼且場場有波入，作客有本錢同主隊鬥攻，捧大盤最好路。
（myTV Gold 302、Now 639、有線615及655台周六晚7時30分直播）