進度勝預期少帥嗌衝冠
德甲新貴RB萊比錫開季後迅速撻着，而且喺聯賽同歐聯雙線作戰愈戰愈勇，今晚強勢迎戰重建中嘅史浩克04，有信心贏波力保住「一哥」席位，萊比錫主場讓一球，黑柴撐上盤。
（Now 671、FOX+、有線652及612台周六晚9時30分直播）
萊比錫今季向賀芬咸撬嚟少帥拿高斯文，佢接手球隊後一直低調，已經唔只一次強調先做好分內工作，不過整體表現同進度明顯比佢預期更好，聯賽領導群雄之餘，歐聯分組賽作客擊敗葡超勁旅賓菲加更係喜出望外，難怪球隊上輪作客3比0大炒雲達不來梅後，拿高斯文首次回應爭霸提問，終於放言話有信心挑戰今季德甲錦標。萊比錫陣中大量年輕球員進度一日千里，箭頭迪姆華拿入球停不了，進攻中場沙比薩更加成為德甲開季後最搶鏡球員之一，根據《踢球者》網站總結頭5輪個人評分，佢僅次於5場入9球嘅拜仁神鋒羅拔利雲度夫斯基之後排第2，而防線主力中堅烏柏美卡奴經過長時間養傷復出後亦回復佳態，令球隊可以喺無後顧之憂下放膽搶攻。
史浩克重建要時間
史浩克04今季亦有新帥大衞華拿領軍，喺佢悉心改造下，近期聯賽3連勝合共轟入10球，同樣畀到球迷驚喜，不過要留意佢哋所遇對手都係弱旅，而且防線同組織能力仍見稚嫩，大衞華拿亦承認好多地方有待改善，今仗作客萊比錫仲會喺不同位置試用不同球員，足見重建工作尚需努力，佢哋上輪主場絕殺弱旅緬恩過程驚險，今晚作客遇強恐難保近期強勢咯。