歐聯玩大佢！
歐聯分組賽進入第二輪，今晚預期連場都會多波入！B組重頭戲係英超熱刺主場迎戰德甲拜仁慕尼黑，熱刺首輪喺兩球領先下遭奧林比亞高斯逼和，回師主場必然強攻求開勝利門，可惜佢哋同拜仁一樣攻強守弱，熱刺嘅哈利卡尼同拜仁嘅羅拔利雲度夫斯基堪稱當今歐洲球壇最炙手可熱神鋒，今仗雙方兩大Goal手過招，黑柴推介中位數2.5/3球大盤。
（myTV Gold 303、Now 643、有線656及616台周三凌晨3時直播）
哈利仔身價英超No.1
熱刺除咗喺歐聯出師不利，目前英超亦只位列第5，主要原因係作客不濟同防線表現令人失望，今季7場英超只有1場冇失波，上輪主場對修咸頓原本以為簡單任務，卻因為晨早踢少個加上門將洛里斯派膠，搞到要艱苦險勝，好在有哈利卡尼奠定勝局，呢位隊長已經連續兩輪聯賽入波，歐聯首戰亦有建樹，係目前英超身價最高球星，根據權威網站《轉會巿場》估價，佢同利物浦嘅穆罕默德沙拿同樣估值1.5億歐元（約12.8億港元），不過實際上佢嘅身價仲不只於此，近期傳出皇家馬德里已準備明年夏天用2億歐元收購，足見呢位神鋒有幾巴閉，今仗有拍檔孫興民同基斯甸艾歷臣支援，主場出擊當然要盡情數胡。
羅拔仔3線作戰狂入波
拜仁近況比熱刺好，喺德甲兩連勝已經重返榜首，箭頭羅拔利雲度夫斯基更成為今季全歐洲效率最高射手，今季6場聯賽共入10球，另外德國盃首圈同歐聯分組賽首戰都有士哥，3線作戰所有正式賽事場場有波入，遇神殺神腳風順到冇朋友，今晚作客倫敦好大機會繼續做Goal手！不過拜仁防線同樣曳，上輪聯賽對榜尾嘅柏達邦都失兩球，甘美治同堤亞高艾簡達拿拍檔雙防中明顯硬度不足，容易輸反擊，作客熱刺好難唔失波。黑柴預期今仗單計哈利仔同羅拔仔嘅入波，都足以開出3球或以上嘅大盤囉！