歐聯D組重頭戲，祖雲達斯主場硬撼利華古遜。兩軍首輪齊失分，今場定必全力搶攻求3分，祖記前線雖有王牌基斯坦奴朗拿度（C朗）掛帥，但近期後防表現差勁，遇上同樣有前無後嘅利華，預期一樣會多波入，2.5球大盤捧得過。
（Now 645、有線603及604台周三凌晨3時直播）
D組榜首嘅竟然係唔起眼嘅莫斯科火車頭，佢哋首輪爆冷作客2比1擊敗利華古遜；利華想保住出線機會，今場作客一樣要搶攻，不過今季8場比賽只有3場冇失波，歐聯輸畀火車頭正正就係門將哈迪基犯下低級錯誤，接應回傳卻交錯波給對手攻入奠勝球致輸1比2，防線水準靠唔住。
祖記上輪2比2作客打和馬德里體育會，單睇比數唔算差，不過佢哋喺領先2球優勢下被追和，後防唔係咁穩。祖記今季3場主場聯賽共失4球，新加盟嘅馬菲斯迪歷特似乎仲未適應意甲節奏，加上幾名閘位球員阿歷士辛度、丹尼路雷斯、迪施基利奧均有傷在身，上場聯賽教練沙利已經要搵馬度迪及古達度客串左、右兩閘，今場捧2.5球入球大好路。