歐聯C組曼城再度出擊，周三凌晨主場迎戰薩格勒布戴拿模。「藍月亮」一班前場攻擊組合夾慣夾熟，進攻效率已達至巔峰，不過戴拿模雖然整體實力欠奉，反擊能力絕對唔弱，呢場即使面對勁敵都未必會死守，中位數3.5球入球大值博。
（Now 644、有線602及662台周三凌晨3時直播）
曼城首戰3比0輕取薩克達，其中喺該仗埋齋嘅巴西射手加比爾捷西斯，季初主力踢盃賽，為爭取更多上陣機會肯定會盡力搶士哥，佢身邊除咗有表現日漸成熟嘅史達寧幫拖，仲有奇雲迪布尼同馬列斯等中場頻頻後上支援，一班進攻組合喺主場球迷吶喊助威下表現特別醒，繼早前聯賽主場4比0大勝白禮頓之後，上仗主場再以8比0羞辱屈福特，火力全開。可惜「藍月亮」後防兵源短缺，兩大中堅史東斯同拿樸迪都依然有傷倦勤，要靠防中費蘭甸奴頂住先，防線難免有隱患。
薩格勒布戴拿模反擊勁
薩格勒布戴拿模開局夠爭氣，上仗歐聯4比0擊敗阿特蘭大，演出極具說服力，其中曾經喺中超揾食嘅前鋒奧錫該仗個人連中三元，射手本色表露無遺，呢場對住後場唔算穩陣嘅曼城，戴拿模隨時有機會靠反擊偷雞，兩軍勢演入球騷，中位數3.5球入球大係好路。