新箭夠Fit勒唔住
今日除咗歐聯分組賽之外，澳足盃、亞冠盃及自由盃都分別上演4強賽事，最早開波嘅澳足盃由布里斯班前鋒主場鬥墨爾本城；墨城新兵奇治盧恩有料到，令攻力如虎添翼；前鋒歷史性殺入4強已告超額完成，冇包袱有力鬥攻，半場大可作過關重心。
（myTV Gold 301、Now 638、有線614及654台周二下午5時30分直播）
澳足盃4強一場過決勝負，墨爾本城今季陣容有唔少變動，除烏拉圭射手科拿路利上季尾已改投珀斯光輝，另外守將迪列特、中場夏利遜及萊利麥基爾均借用期滿離隊，不過新加盟嘅保頓前鋒奇治盧恩喺今屆3場澳足盃上陣都有士哥，佢同國腳占美麥卡倫仲包辦晒墨城今屆喺澳足盃嘅8個入球，表現合拍。
串艾薩德勝河床細
布里斯班前鋒係澳洲昆士蘭省球隊，澳足盃創辦至今從未試過有非澳職球隊殺入決賽，前鋒嚟到4強已算超額完成。呢隊波喺32強曾憑互射12碼淘汰威靈頓鳳凰，實力唔可以睇小，而且佢哋連續3場澳足盃都係先入波一方，踢法搶韁，對住今屆3場澳足盃上半場開2球或以上嘅墨城，一於揀1.5球半場大。
亞冠盃及自由盃4強踢兩回合，今輪係首回合，先講亞冠盃艾薩德主場鬥希拉爾。艾薩德今屆5場亞冠盃主場全部贏晒，水準有保證捧主勝。
（Now 670、Fox+、有線611及651台周二晚11時30分直播）最後自由盃4強上演阿根廷國家打吡兼上屆決賽翻版戲碼，河床主場先鬥小保加。兩軍近年交鋒互有勝負，彼此熟晒路，小保加喺各項比賽保持13場不敗，期間僅失2球，12場總入球開2球或以下，首回合作客料會踢得更小心，首選2.5球細。（周三早上8時30分開賽，馬會網上文字直播）