新兵唔夠火衰過上季
假期前夕難得有英超BIG6大戰，曼聯主場對阿仙奴，就算夜啲開波都值得捱夜。曼聯今季無法擺脫上季季尾嘅頹勢，蘇斯克查上任初期嘅光環早已失去，反觀「兵工廠」愈戰愈勇，新兵對辦加上射手奧巴美揚狀態火熱，今場受讓平半下盤值得捧場。
（Now 621及611周二凌晨3時直播）
曼聯上周聯賽以0比2不敵韋斯咸後，上周中英聯盃更畀甲組仔羅奇代爾逼和，連前領隊摩連奴都忍唔住話，今季嘅曼聯比上季更不濟，至於前隊長堅尼亦毫不客氣，批評三名新兵都係來自細球會，欠缺對勝利嘅執著，對曼聯幫助唔大，連自己友都唔幫口，可見曼聯季初表現幾咁大鑊。
事實上，曼聯今季最大問題來自進攻，6場聯賽僅入8球，只係曼城嘅三分一，打正箭頭嘅拉舒福特拚勁有餘，火候卻未夠，加上佢同安東尼馬迪爾都有傷在身，今場要倦勤，要靠17歲嘅格連活特擔大旗，確實令人擔心。
另一邊廂嘅阿仙奴卻係打出信心，新兵大衞雷斯、丹尼施巴路斯、尼高拉斯比比極速融入球隊，上周對維拉喺踢少一人嘅劣勢下反勝對手3比2，上周中英聯盃亦大勝森林5比0，近3仗攻入11球，同曼聯嘅狀況各走極端。
阿仙奴奧巴美揚弗爆
由於哥斯尼、施治及艾朗藍斯等前隊長今季先後離隊，阿仙奴領隊艾美利上周決定委任格列沙加為新隊長，而季初大勇嘅奧巴美揚則任副隊長。講起奧巴美揚，佢喺過去16場取得16個入球，腳風可謂相當順，如果計入球效率（Shot Conversion），佢加盟阿仙奴以來26.2%更喺英超名列前茅，平均每4次射門就有1個入球，今仗勢必成為曼聯心腹大患，首名入球可以諗諗佢。