羅渣士KO布魯士
今晚英超獨腳戲，「狐狸」李斯特城主場迎戰「喜鵲」紐卡素。李斯特城自羅渣士喺上季季中接手後，搶分能力飆升，撞正攻力疲弱嘅紐卡素，可藉地利再下一城，讓球盤要讓一球亦冇有怕，照揀上盤。
（Now 621周日晚11時30分直播）
從2016年神奇奪冠，到上季泰國班主維猜意外離世，李斯特城近年表現反覆，內訌不斷，尤其係前主帥佩爾與球員關係緊張，並喺上季季中黯然下台，由羅渣士接手。呢位前利物浦及些路迪教頭掌舵後瘋狂搶分，自從今年2月26日起，直至上輪英超為止（唔計今輪），「狐狸」跨季聯賽取得31分，只係僅次於聯賽雙雄曼城同利物浦，成為呢段時間搶分第3多球隊，唔講得笑。
齋講今季，李斯特城開局表現唔錯，頭6場聯賽只曾1敗位居前列，當中不乏作客逼和車路士1比1、上輪喺主場反勝熱刺2比1嘅硬仗，雖然羅帥謙稱關心球隊嘅表現多過賽果，但佢已逐漸令「狐狸」順利過渡，3年前嘅奪冠功臣慢慢淡出或離隊，正選只剩番占美華迪同卡斯柏舒米高，芝維爾、泰利文斯、占士麥迪臣等新仔亦趁機上位，難怪開季戰績穩步上揚。
紐卡素火力英超最弱
另一邊廂，紐卡素趕走深受愛戴嘅主帥賓尼迪斯，搵嚟曾執教死敵新特蘭嘅布魯士接手，先天已經得罪球迷，而「肥布」亦相當黑仔，加盟冇耐就傷兵滿營，就算辛特麥斯明、耶迪連、馬特列治等已復操，但狀態都成疑。「喜鵲」喺佢麾下，最大問題過於重視防守，令火力大跌Watt，開季頭6場聯賽贏得1場之餘，仲要入得4球咁大把，係聯賽火力最弱球隊之一，見到都唔開胃，讓球盤李斯特城要讓一球，上盤值得捧場。