球壇近幾年發展似乎都係整體大於個人，球場上少咗一啲性格巨星。不過今日球迷有福喇，兩大神人「巴神」巴洛迪利同「戰神」伊巴謙莫域齊齊出場，巴洛迪利加盟意甲布雷西亞有望重振雄風，伊巴謙莫域愈老愈可愛，爭取成為美職常規賽神射手，大家可以一睹兩大神人風采。
唔願輸畀卡路士韋拿 伊巴搶神射手盡情數胡
美職常規賽仲有2輪煞科，名牌球隊洛杉磯銀河已經穩奪季後賽資格，不過王牌前鋒伊巴謙莫域有機會爭做神射手，主場對住西岸包尾嘅溫哥華白帽定必加多兩錢肉緊，3.5球大盤好路。
（myTV Gold 301、Now 638、有線614及654台周一早上7時30分直播）
銀河球星伊巴謙莫域轉入常規賽直路全面大爆發，對上12場聯賽個人轟入10球，除咗帶領銀河穩入季後賽，自己亦以28個聯賽入球排喺射手榜第2位，呢個入球數字唔只打破咗銀河單季最高入球紀錄，而且仲佔咗銀河今季常規賽入波（53球）比率超過一半有多，效率夠晒誇張。
對弱旅白帽銀河不勝無歸
伊巴依家喺射手榜落後FC洛杉磯射手卡路士韋拿2球。呢兩大球星今季曾經就邊個係美職最佳球員針鋒相對，韋拿認為無論喺入球數目及助攻次數都比伊巴優勝；伊巴就覺得自己年紀較大，暗寸韋拿喺30歲前已經要去美職搵食，級數同自己唔同，試問伊巴點會甘心喺神射手榜屈居韋拿之後？呢場係銀河今季常規賽最後一場主場賽事，對手又係西岸包尾、肯定無緣季後賽嘅溫哥華白帽，以銀河近5場主場聯賽取得4勝1和走勢，大有不勝無歸之感，中位數3.5球大盤捧得過。
回流意甲博返國家隊 巴神領布雷西亞大起里
有巴洛迪利加盟嘅布雷西亞，周中快車挑戰完衞冕嘅祖雲達斯之後，今晚又要對上季亞軍拿玻里。布雷西亞出過唔少傳奇球星，巴治奧、派路、赫傑及哥迪奧拿都曾經效力，上場已經處子上陣嘅巴洛迪利，今仗必然會正選出戰，再加上拿玻里中堅高列巴尼停賽，「巴神」有機會取得入球，今仗捧3.5球入球大。
（myTV Gold 301、Now 638、有線654及614台周日晚6時30分直播）
布雷西亞從未攞過意甲冠軍，今季係時隔8年再度重返意大利頂級聯賽，多年來都徘徊喺意甲同意乙之間，但呢隊波好似有種特別吸引力咁，搵到唔少大牌球星加盟。「神奇小馬尾」巴治奧選擇將自己職業生涯最後一站，喺布雷西亞結束；世界級中場派路更直接喺布雷西亞出道，之後再踏上大師之路。呢支意大利北部球隊，大軍名單亦出現過意大利射手東尼、羅馬尼亞傳奇赫傑、現任曼城領隊哥迪奧拿嘅名字，近年就有斯洛伐克殺手咸錫。
嚟到2019年，布雷西亞球隊史上又可以增加一個球星名字，佢就係巴洛迪利。29歲嘅「巴神」渴望出席2020年歐國盃決賽周，所以有唔少海外球會招手，佢都寧願留喺意甲，希望可以再次披上意大利國家隊球衣。藍衫軍主帥文仙尼同巴洛迪利感情深厚，有關注愛將加盟布雷西亞，佢被問及巴洛迪利再入國家隊可能，文仙尼話：「佢只喺職業生涯中期，如果佢想嘅話，應該仲有一番作為。」暗示大門仍然為巴神打開，但仍然要睇呢名前鋒自己造化。
拿玻里轟13球聯賽之冠
巴洛迪利上場對祖雲達斯表現中規中矩，但質素明顯比隊友高唔只一班，教練話佢嘅加盟激活咗其他隊友，前鋒當拿隆馬更先開紀錄，累積入咗4球，相信有「巴神」傍住，可以有更佳發揮。拿玻里雖然排第4，但5仗入13球係意甲暫時入波最多球隊，雙方有機會上演入球騷，3.5球入球大趁早買。