周五黃昏上演日職獨腳戲，大阪飛腳主場硬撼北海道札幌岡薩多，等阿King度條過關心水畀大家。飛腳表現主強客弱，為遠離降班漩渦，主場肯定會搏盡搶分，面對近期聯賽走勢飄忽嘅岡薩多，飛腳有力搶Ｗ，2.42倍主勝值博。
（有線602及662台周五晚6時直播）
上仗聯賽喺打吡戰輸畀宿敵大阪櫻花之後，飛腳繼續徘徊聯賽積分榜下游，僅以3分優勢壓過排名16位、位列尾3嘅鳥棲砂岩，護級任務尚未完成，為搶分絕對冇得鬆懈。好彩飛腳地頭出擊特別硬淨，近9仗聯賽主場保持不敗，防守表現值得信賴，今場仲有主力翼鋒小野瀨康介坐完波監復出，前場攻擊力有望增強，對住後防時有甩漏嘅札幌岡薩多，飛腳隨時有得偷雞，一於博主勝。
紐維爾舊生托弗博「讓主」
去到周六早上有多場阿甲上演，首先有紐維爾舊生對班菲特。舊生主場表現所向披靡，開咧4仗主場全勝，而且每場都贏對手2球或以上，球員信心爆棚。反觀班菲特近況麻麻，近6場聯賽僅得1勝1和4負不濟成績，而且入球能力極之疲弱，今場不妨進取啲揀讓球主勝。最後有圖庫曼體育會主場挑戰泰拿尼斯，圖體會近3仗聯賽不勝，而且1球都入唔到，戰力成疑，對住前列分子泰拿尼斯都好難招架，讓球客勝值得捧場。