啞火曼聯後備兵迎戰
歐霸盃L組賽事，「紅魔鬼」曼聯喺海牙京瓷球場鬥荷甲代表「AZ」阿爾克馬爾。AZ今季喺各項比賽15場只輸1場，其中對上3場聯賽全勝兼冇失波，近況對辦；反觀曼聯今季攻不銳、守不穩，作客讓平半咪以為筍盤，計落真係揀唔落手，AZ下盤捧得過。
（myTV Gold 303、Now 643、有線616及656台周五凌晨零時55分直播）
阿爾克馬爾主場AFAS球場上蓋喺今年8月因受強風吹襲倒塌，暫時主場比賽都要移師海牙京瓷球場上演。AZ今屆由歐霸盃第2圈外圍賽打起，至今連同聯賽一共踢咗15場比賽，取得8勝6和1負理想成績，唯一輸波嗰場仲要喺完場前失12碼，先至輸畀維迪斯，表現極之硬淨。AZ對上3場聯賽先後擊敗海牙、飛燕諾及荷華高斯，而且連續3場都冇失波，依家喺荷甲排第3位，僅以1分落後榜首雙雄阿積士及燕豪芬，絕對有真才實料。
紅魔防線慌失失
紅魔鬼首輪分組賽以1比0小勝哈薩克球隊艾斯坦拿，表現唔算有說服力，嗰場比賽領隊蘇斯克查用咗大部分副選，包括馬高斯盧祖、杜安薛比、尼曼查馬迪、費特洛迪古斯及鍾達希等等，結果曼聯贏波輸盤，今場好大機會照辦煮碗。曼聯喺英超揭幕戰大勝車路士4比0，可惜之後無以為繼，及後8場比賽從未試過單場入多過1球，而且除上述提過對艾斯坦拿，同聯賽1比0贏李斯特城之外，其餘6場都有失波，表現攻不銳、守不穩，預計今場表現都唔慌會有突破。
曼聯目前喺分組賽1戰手執3分，所以今場輸波或失分唔會係世界末日，睇番紅魔對上一次出戰歐霸盃分組賽，即2016/17年成功捧盃嗰屆，當時曼聯頭2場作客分組賽都輸波收場，包括0比1不敵另一支荷甲球隊飛燕諾。以紅魔今季喺各項賽事作客未贏過嘅表現嚟睇，今仗再輸一啲都唔奇，紅魔讓平半，必捧AZ下盤。