歐霸F組上演榜首大戰，阿仙奴主場鬥標準列治。「兵工廠」射手奧巴美揚腳風順到冇朋友，成功擔起進攻大旗，加上有中場施巴路斯提供彈藥，整體質素絕對比對手更勝一籌，度士睇好阿仙奴乘主場之利輕取歐洲二流聯賽分子標準列治。（MyTV Gold 303台、Now 643、有線616及656台周五凌晨3時直播）
阿仙奴今季出戰歐霸首仗就要作客挑戰德甲勁旅法蘭克福，賽前相信唔少球迷同我一樣，都以為會係一場勢均力敵嘅對決，勢估唔到「兵工廠」進攻踢出雷霆萬鈞之勢，最終3比0痛擊主隊，表現極具說服力，可見被譽為「歐霸專家」嘅主帥艾美利，對呢項賽事十分重視。而且「兵工廠」首席射手奧巴美揚近5仗斬獲6球弗到漏，包括上仗射入關鍵入波逼和勁敵曼聯，而為加蓬射手送出助攻嘅小將沙卡近期亦迅速上位，搭住西班牙中場大腦丹尼施巴路斯，阿仙奴表現值得期待。
標準列治質素低一班
標準列治雖然首戰以2比0擊敗甘馬雷斯，不過所處嘅比利時聯賽只屬歐洲二流，整體質素難有保證，況且球隊近7仗歐霸作客贏得1場，表現根本畀唔到人信心，呢場作客好難同阿仙奴周旋，「兵工廠」贏埋今仗出線形勢更加樂觀，鬥志十足之下預期又會有一場大勝。