今晚H組大戰車路士作客法甲里爾。車仔喺少帥林柏特帶領下「全民皆攻」，入得又失得堅性感，而且喺歐聯客場例多士哥，加上雙方首輪都輸波而回，預計今場為搶分唔會龜縮，2.5球嘅入球大有買趁早。
（Now 645、有線604及603台周四凌晨3時直播）
車仔自林柏特回巢執教後，崇尚進攻，重用年輕球員喺中前場打高位逼搶，確令火力大增，無論係正選嘅譚美阿巴謙、美臣蒙特、尼高路簡迪，抑或後備的巴舒亞伊、列斯占士等，都喺今季開咗齋。不過太過進取亦令防線暴露更多漏洞，今季10場正式賽事，當中9次有失球，尤其中堅魯迪格仲未好番，無論起用安達斯基斯坦臣、葛特蘇馬或湯姆利，防線都難言穩陣。
雙方求3分唔會龜縮
里爾今夏高價賣走首席射手尼高拉斯比比，搞到戰績下滑，不過聯賽主場4戰全勝威力猶在，而新加盟嘅域陀奧森漢頭8場聯賽入6球亦交足貨。雙方首輪都落筆打三更，里爾作客慘吞阿積士3蛋，車仔則喺巴克里射失12碼下1球不敵華倫西亞，為爭出線唔會打守勢波。何況車仔近6場歐聯作客全開3球或以上，今場向2.5球嘅大盤埋手最上算。