歐聯E組賽事，衞冕嘅利物浦喺晏菲路主場迎戰奧地利班霸「紅牛」薩爾斯堡。紅軍首戰落筆打三更，今返主場不容再失；紅牛上場雖然大勝亨克6比2，不過對手實力太弱不得作準，單計歐洲賽經驗同實力佢哋輸紅軍幾條街，主隊讓球半、兩球照捧上盤。
（myTV Gold 303、Now 643、有線616及656台周四凌晨3時直播）
晏菲路主場鑊氣勁
上屆冠軍利物浦首輪分組賽出師不利，作客意甲勁旅拿玻里完場前連失2球輸0比2，不過佢哋主場威力人所共知，唔單止喺今季英超3戰全勝入10球、全部淨勝對手2球或以上，而且上屆6場歐聯主場攞到5勝1和，最經典係4強以4比0大炒巴塞，兩回合計總比數反勝4比3，相信對首次打入分組賽嘅薩爾斯堡嚟講，要應付晏菲路主場氣勢都幾難。
紅牛另一隱憂係首場分組賽連中三元嘅19歲新星夏蘭特帶病在身，呢位名將之後上周末聯賽抱恙缺陣，雖然報道指佢可望趕及今場披甲，但狀態未必十足，況且紅牛上場對住實力最弱嘅亨克都要失兩球，後防唔係咩好貨色，紅軍主場贏兩粒唔難，讓球半、兩球上盤捧得過。