今晚歐聯H組嘅榜首大戰，華倫西亞主場對阿積士。自新帥施拿迪斯接手後，華倫進攻有顯著改善，其中新兵麥斯高美斯迅速上位表現對辦；上屆4強分子阿積士踢法進取，細鬼睇好入球騷出現，中位數2.5球大盤好路。（有線601及661台周四凌晨3時直播）
蝙蝠軍團換帥火力重現
華倫早前出現動盪，主帥馬些連奴畀班主林榮福炒魷，由施拿迪斯臨危受命，好彩一班球員冇被事件影響，分組賽首戰就係被睇淡情況下，作客小勝車路士。查實施拿迪斯上任後，「蝙蝠軍團」進攻效率的確有所提高，尤其新加盟嘅烏拉圭前鋒麥斯高美斯，喺加美路受傷期間成功上位，聯賽剛仗主場對住基達菲個人梅開二度，隨住呢位烏拉圭人同鋒線拍檔洛迪高摩連奴愈夾愈熟，預料華倫進攻會變得更流暢。
上屆驚喜球隊阿積士今屆首戰演出符合預期，以3比0大破里爾，延續呢支荷甲勁旅一貫嘅主攻踢法，其中昆斯普美斯加盟後，進一步豐富球隊進攻路數，呢位荷蘭國腳今季聯賽已射入5球，證明順利融入，配合上屆歐聯大放異彩嘅薛耶治及杜辛泰迪治等攻擊好手，阿積士作客都有本錢同華倫鬥攻，大盤唔好錯過。