周三晚亞冠4強首回合一觸即發，日職代表浦和紅鑽主場迎戰中超勁旅ＦＣ廣州。紅鑽狀態低沉，就算主場出擊都無絕對把握贏波，不過廣州今屆亞冠盃作客表現亦未如理想，尤其攻力麻麻，呢場轉捧中位數2.5球入球細好過。
（Now 670、有線611及651台周三晚6時30分直播）
紅鑽今屆分組賽於G組6戰得10分以次名出線，進入淘汰賽仲先後淘汰蔚山現代同上海SP，不過睇真啲，紅鑽近4仗亞冠法定時間僅取1勝，當中2仗主場僅獲1和1負，計埋國內聯賽加盃賽，紅鑽最近一次贏波，已經要數到去8月中喺天皇盃擊敗日乙球隊水戶蜀葵，其後各項賽事10場只得5和5負，狀態低沉，就算主場出擊都難有贏波把握。
ＦＣ廣州今屆晉級過程亦欠說服力，16強憑互射12碼淘汰ＦＣ山東，上圈8強兩回合計以1比1打和鹿島鹿角，要靠作客入球優惠先氣走呢支衞冕冠軍，總計ＦＣ廣州今屆5場亞冠盃作客只得2和3負，其中近4場總入球3次開2球或以下，鋒力疲弱，同進攻核心泰利斯卡傷出後未能回復最佳狀態不無關係，呢次作客都會先求穩陣，未必會貿然搶攻，中位數2.5球入球細值得捧場。