周一凌晨美職常規賽煞科戰，12場賽事同時開打，其中西岸波特蘭伐木者主場對聖荷西地震，雙方為爭季後賽資格，定必搏盡目標擸晒3分，可惜地震作客戰績實在不敢恭維，呢場焗攻導致後防空虛，隨時益咗伐木者，主勝值博。
（周一凌晨4時開賽）
賽制上，東西兩岸頭7位可以躋身季後賽，惟東岸第8位嘅芝加哥火燄已落後第7位嘅新英倫革命達6分，所以呢個煞科日對東岸球隊嚟講只係排名之爭。相反，西岸情況就激得多，目前伐木者雖排第6，但比起今場對手、排第8嘅地震只係多2分咁大把，今仗如果輸波隨時功虧一簣，好彩佢哋有前美職最佳球員華拿里同施巴斯坦白蘭高兩位阿根廷中場孖寶壓陣，整體質素有保證，況且地震近6場作客輸晒，仲有主力湯美湯臣停賽缺陣，呢場想搶分都幾難，睇好伐木者贏波入季後賽。
FC達拉斯W「肯」定得
同時間開波嘅仲有FC達拉斯主場鬥肯薩斯體育會，排西岸第7嘅FC達拉斯近4仗主場取3勝1和氣勢如虹，今仗只要贏波即可鎖定做「前七」，萬一前面嘅伐木者有乜閃失輸波，仲有機會微升1位，所以一定唔會放軟手腳。反觀對手肯體會非但無緣季後賽，戰意成疑，加上主力中場羅渣艾斯賓路沙同伊利山齊士齊齊坐波監，FC達拉斯呢口主勝值得捧場。