教練想輪換 雙箭唔肯抖
前日係德國國慶，德甲球隊基本上都畀球員休息，不過近期着晒火嘅拜仁雙箭基拿比同羅拔利雲度夫斯基，就有得抖都唔肯抖，原本拜仁今晚主場對賀芬咸嘅德甲，教練尼高高華打算畀佢哋輪休，但兩人都請纓繼續擔正，整定態沉兼殘陣嘅賀芬咸唔好彩，拜仁狂炒熱刺後勒都勒唔住，今晚遇弱讓到兩球半、三球都要追上盤。
（Now 670、FOX+、有線651及611台周六晚9時30分開賽）
拜仁雙箭係近期全歐洲最火熱球員，基拿比上輪聯賽對柏達邦一射一傳原來只係小兒科，剛周中歐聯作客熱刺食出大四喜，立即成為全球熱話；至於羅拔仔對熱刺亦梅開二度，今季3線作戰保持場場入波，9場比賽共轟入14球。教練尼高高華原本打算今晚大輪換，點知兩人就要求繼續踢，不過拜仁都會畀近期上陣時間較少嘅湯馬士梅拿、比列錫、哥倫天杜利素同查維馬天尼斯更多表現機會，呢班副選本身質素唔使懷疑，近期少踢自然更加搶韁，有足夠動力繼續爭取大勝保持近期強勢。
殘陣賀芬咸今非昔比
賀芬咸今季3線大失血，仲畀人撬走埋教頭拿高士文，黑柴季初已經講明要撐佢哋對家，果然開季6場聯賽只得5分，搞到新帥舒路達開始面臨信任危機，球隊人腳今非昔比，除流失咗祖連頓、迪米亞巴爾、尼高舒侯斯等主力外，仲傷兵滿營，一對最有威脅射手卡拉馬歷同貝迪迪爾，仲有中場沙馬斯高同史堤芬蘇巴都要養傷，後防大哥奇雲禾治上輪對慕遜加柏傷出上陣成疑，既然上輪主場都要吞慕遜加柏3蛋，今晚作客面對班霸拜仁，仲有近3次對賽都射破佢哋大門嘅羅拔仔，想輸少當贏恐怕都幾難。