周一凌晨西甲壓軸大戰，巴塞隆拿將會主場迎戰西維爾。巴塞主場出擊重攻輕守，頻頻同造訪對手對攻，加上呢支衛冕之師近年面對西維爾場場都多波入，兩軍為搶分今仗勢必大晒冷，中位數3.5球入球大係不二之選。
（Now 611及632周一凌晨3時直播）
巴塞今季衛冕之路荊棘滿途，作客先後輸畀畢爾包同ＣＦ格蘭納達，好彩3場聯賽主場全勝，近3仗共轟12球，為追趕馬德里雙雄，呢場必定繼續搶攻。好消息係球王美斯傷愈復出後，狀態漸入佳境，上場歐聯正選上陣仲為好拍檔蘇亞雷斯送出助攻，幫助後者喺比賽中成功梅開二度，帶領巴塞以2比1反勝國際米蘭，呢場兩人再度聯手，配合巴西中場艾法美路喺中場輸送彈藥，攻力有保證。不過巴塞今季4場主場賽事都有失波，而且繼主力中堅烏姆迪迪傷出後，另一守將基文迪朗格勒呢場亦要停賽，後防隱患無窮。
交手近績例多波入
西維爾今季陣容雖然變動頗大，幸隨住球隊默契漸佳，進攻效率亦明顯提高，近2場聯賽就轟入5球，全開4球或以上，加上西維爾近3次聯賽同巴塞交手亦全開4球或以上，呢場兩軍勢再演對攻戰，中位數3.5球入球大係好路。