周六晚英超早場，白禮頓主場迎擊熱刺。熱刺今季表現跌晒Watt，尤其作客明顯冇料到，相反「海鷗」主場出擊球風硬朗，呢場對住勁敵擺出死守陣，熱刺一班主力冇態好難破到嚴防，形勢隨時陷入膠着，中位數2.5球入球細係好路。
（Now 611及621周六晚7時30分直播）
熱刺啱啱喺歐聯主場以2比7侮辱性大敗畀拜仁慕尼黑，分組賽2戰不勝，士氣被打入谷底，事實上，比起上季嗰支殺入歐聯決賽、勇奪英超第4嘅超強表現，今季佢哋可以話係判若兩隊，連領隊普捷天奴都坦言：「軍心受動搖。」
熱刺低迷狀態亦直接影響作客成績，早前聯賽盃面對英乙球隊高車士打，熱刺就算派出孫興民、基斯甸艾歷臣同迪利阿里等大牌球星上陣，法定時間90分鐘內都搞唔掂對手遭逼和0比0，最終仲要射輸12碼遭淘汰，足證佢哋嘅問題幾咁嚴重。
鋼門馬菲賴恩靠得住
白禮頓英超主場雖然至今未贏過，可幸防守表現仲算硬淨，近5仗主場有4次開2球或以下，包括上仗聯賽主場1比1逼和般尼，其中澳洲鋼門馬菲賴恩發揮神勇，有佢把關「海鷗」防守有保證。況且熱刺近5次面對白禮頓，有4次開2球或以下，隊中進攻乏力問題如果解決唔到，面對擺出鐵桶陣應戰嘅「海鷗」，熱刺都好難有運行，捧番中位數2.5球入球細好過。