老友拗手瓜熟晒路
英超BIG 6地位近年可謂穩如泰山，過去5季就有4季前六位置由Big 6包辦，唯一動搖到就係2016年李斯特城奇迹性封王，今季「狐狸」開個靚頭暫佔第3，究竟有冇機會突破六雄壟斷局面？今晚作客聯賽7連勝嘅利物浦會係最大考驗。樂比認為「紅軍」今場小勝機會高，捧讓球和及半場入球細。
（Now 621周六晚10時直播）
雖然英超只踢咗7輪，但幾乎所有人已認定，今屆冠軍係曼城與利物浦之爭，因為兩隊踢嘅係完全兩個世界嘅足球。利物浦開季以來發揮穩定，聯賽7連勝穩佔榜首，縱使穆罕默德沙拿偶爾被批評踢法獨食，但「埃及文明」總算合作愉快，三人合共包辦11個入球。
翻查利物浦對上一次聯賽主場輸波紀錄，已經係2017年4月輸畀水晶宮，換句話講利物浦已經接近兩年半主場未輸過，上季主場勝率更接近九成，所以反利物浦唔單止需要極大勇氣，而且仲極大風險，樂比真係唔建議咁做，倒不如小敲分頭不俗嘅讓球和，博紅軍險勝一粒。
李斯特城未試過輸多過1球
李斯特城自今年2月由羅渣士接掌後，確實令隊波進步唔少，去季收咧前3場分別大勝阿仙奴3比0、僅敗曼城0比1及和車路士0比0，已證明佢哋同Big 6嘅距離相當接近，季初對Big 6嘅3仗成績分別為1勝1和1負，亦再次印證咗以上論點，故今場對利物浦唔係話冇得打。
羅渣士作為利物浦嘅前領隊，高普嘅上一手，佢對利物浦嘅踢法肯定有充分理解，事實上兩人關係非淺，當年高普入主利物浦嘅時候因為搵唔到屋，羅渣士直頭畀間屋佢住住先，兩人私底下亦有聯絡，甚至稱得上係老友，話唔定羅渣士會喺蛛絲馬迹中搵到破敵之計。
睇番數據，羅渣士接掌李斯特城後只係輸過4場，從未輸多過1球，利物浦今場要贏多過1球唔易，而羅渣士執教嘅17場聯賽當中，只有2場半場總入球多過1球，可見李城上半場嘅踢法係極其保守，玩半場細啱數。