良性競爭激活鋒線
今晚英超頭場之一，「2哥」曼城主場迎戰狼隊。「藍月亮」王牌阿古路雖然聯賽連續入波斷纜，但佢同「耶穌仔」加比爾捷西斯輪住上陣，有利保持狀態，另一射手史達寧啱啱打破球會生涯百球大關，面對狼隊必定狂轟猛炸，主勝冇肉食，轉捧3.5球嘅大盤最上算。
（Now 621周日晚9時直播）
曼城上場聯賽贏愛華頓3比1，王牌阿古路雖冇士哥，開季連續6場聯賽入波走勢斷纜，但依家仍以8球暫列射手榜首位，主帥哥迪奧拿繼續安排佢同加比爾捷西斯輪流上陣，確保呢名阿根廷前鋒抖到夠避免搏殘。「耶穌仔」亦同樣受益，近4次正選披甲皆有斬獲，喺良性競爭下全面激活兩大射手。
史達寧球會入球破百
至於曼城另一射手史達寧亦弗到震，繼上場聯賽鬥愛華頓建功後，上周中歐聯分組賽鬥薩格勒布戴拿模更加先拔頭籌，協助球隊贏2比0，個人喺球會生涯入波達到101球，腳風奇順。就算奇雲迪布尼今仗因傷缺陣，仲有開咧即入局嘅馬列斯、貝拿度施華等後上支援，真係令對手防不勝防。
魯爾占美尼斯夠料偷雞
不過「藍月亮」一向攻強守弱，喺中堅拿樸迪因傷長抖後，防線堅唔穩陣，開咧後7場聯賽有4場未能保持清白之身，總入球全開4球或以上，狼隊有前鋒魯爾占美尼斯擔大旗下，絕對有機會偷雞入波，主勝賠率太熱冇肉食，捧3.5球嘅入球大最明智。