三獅兵團步向車仔化

2019-10-05 09:15 来源:滚球网

林柏特發功4星入圍
下周又到國際賽檔期,各大聯賽紛紛讓路,當中出戰歐洲國家盃外圍賽嘅英格蘭,喺11日及14日分別作客捷克及主場對保加利亞,主帥修夫基日前公布大軍名單,車路士中堅湯姆利首度獲徵召,加埋首席射手譚美阿巴謙亦獲重召,連同巴克里及美臣蒙特兩大中場,英格蘭實行全面「車仔化」!

喺歐國外A組4戰全勝高踞榜首嘅英格蘭,出線可以話問題不大,佢哋嚟緊分別面對捷克及保加利亞,主帥修夫基點兵一於「搞搞新意思」,除一班熟口熟面如哈利卡尼、史達寧、拉舒福特及佐敦軒達臣外,今次大戶屬於車路士,分別有湯姆利、譚美阿巴謙、巴克里及美臣蒙特入選,證明林柏特帶領「藍戰士」所奉行嘅青春火花路線得到認同。

當中中堅湯姆利今季不乏落場機會,演出亦大獲好評,尤其譚美阿巴謙及美臣蒙特更加屬球會進攻靈魂,夾埋為車仔喺聯賽轟入10粒,入選大國腳絕對合理。咪忘記車仔仲有中場羅夫度卓克同翼鋒赫臣奧杜爾兩位新星,話「三獅兵團」嚟緊係車仔天下,絕對唔過分。

「連美斯」阿里名落孫山
不過有人歡喜有人愁,曼聯嘅連格同熱刺中場迪利阿里就雙雙落選今次名單,「連美斯」今季冇腳好波,經常畀曼迷鬧爆;而傷愈冇耐嘅阿里亦未能重拾最佳狀態。至於今次有兩位海外兵獲徵召,分別為效力馬德里體育會嘅捷比亞,以及多蒙特快翼查頓辛祖。